– Vi i Uloba har ikkje berre tilrettelagt for borgarstyrt personleg assistanse (BPA) – vi har faktisk skapt tenesta vi tilrettelegg for.
Det sa generalsekretær Stig Morten Skjæran i Uloba på Handelskonferansen i regi av Virke mot slutten av september.
Konferansen er eit årleg arrangement for handels- og tenestenæringa og ein hovudarena for Virke, for nettverksbyggjing, kunnskapsdeling og debatt. Skjæran deltok i programposten «Hvordan kan private bidra til å løse oppgaver når velferden er under press?». Panelsamtalen handla om korleis private bedrifter kan bidra til å løyse offentlege oppgåver på ein god måte, ifølgje programmet for konferansen. Generalsekretæren nytta særleg høvet til å nemne den nye samfunnsøkonomiske analysen om BPA. Analysen er gjennomført av Vista Analyse på oppdrag frå BPA-koalisjonen.
Les meir om BPA-koalisjonen og den samfunnsøkonomiske analysen av BPA her.
Saka held fram under biletet.
BPA er kostnadseffektivt
– Vi samarbeider med mange svært dyktige kommunetilsette over hele landet, og vi veit – gjennom den nye Vista-analysen og andre samfunnsøkonomiske analysar – at BPA er eit særs kostnadseffektivt verkemiddel. Det gjev både økonomiske og samfunnsmessige gevinstar. Fleire kjem i arbeid, kommunane får auka skatteinntekter, innbyggjarane får meir fridom og auka livskvalitet, og fleire får høve til å ta utdanning, sa Skjæran.
Til slutt vart paneldeltakarane utfordra til å kome med ein beskjed til ungdomspolitikarane som skulle på scenen i neste programinnslag.
– Eg oppmoda om at politikarane lyttar til dei røynde «fjellfolka» når dei skal navigere BPA-landskapet. Dei har høve til å sørgje for at BPA blir henta ut av den kommunale helse- og omsorgslovgjevinga og over til staten og eige lovverk.